چۆمسكی له‌م وتووێژه‌ دا پێی وایه‌ هه‌ژمونی جیهانیی ویلایه‌ته‌ یه‌كگرتووه‌كانی ئه‌مریكا روو له‌ كزییه‌، به‌ڵام هه‌نوكه‌ش توانای كۆنترۆڵی هه‌یه‌.

پرسیار: ئایا ویلایه‌ته‌ یه‌كگرتووه‌كانی ئه‌مریكا هه‌مان هه‌ژمون و كۆنترۆڵی پێشووی به‌سه‌ر پاشكه‌وته‌كانی وزه‌ له‌ رۆژهه‌ڵاتی ناوه‌راست ماوه‌؟

 

وه‌ڵام: وڵاتانی گرنگی خاوه‌ن وزه‌ هه‌نوكه‌ش له‌ ژێر ركێفی ئه‌و دیكتاتۆرانه‌دان كه‌ رۆژئاوا پیشتیوانیان لێ ده‌كات.

 

هه‌ر بۆیه‌ش ده‌سكه‌وته‌كانی به‌هاری عه‌ره‌بی گه‌لێك به‌رته‌سك و هاوكاتیش زۆر گرنگن. ئه‌و سیسته‌مه‌ دیكتاتۆریانه‌ی به‌ده‌ست رۆژئاواییه‌كانه‌وه‌ن به‌ره‌و كزی و نه‌مانن كه‌ ده‌مێكیشه‌ وایه‌. بۆ وێنه‌ ئه‌گه‌ر چاو له‌ 50 ساڵی رابردوو بكه‌ین، سه‌رچاوه‌كانی وزه‌ (ئه‌وانه‌ی به‌رنامه‌رێژانی ئه‌مریكایی پێیانه‌وه‌ سه‌رقاڵ بوون) زۆربه‌یان نیشتیمانی بوونه‌ته‌وه‌. گه‌لێك هه‌وڵیان بۆ له‌باربردنی ئه‌و پرۆسه‌ به‌ نیشتیمانی بوونه‌ داوه‌ كه‌ سه‌ركه‌وتوو نه‌بووه‌.

 

بۆ وێننه‌ برواننه‌ ده‌سدرێژی ئه‌مریكا بۆ سه‌ر عێراق. گشت (مه‌گه‌ر ئایدۆلۆگه‌ دۆگماتیسته‌كان) له‌و باوه‌ره‌دان كه‌ ئه‌وه‌ سۆزی ئێمه‌ بۆ دیموكراسی نه‌بوو كه‌ كرایه‌ بیانووی هێرش بۆ سه‌ر عێراق، به‌ڵكوو هۆكاره‌كه‌ی ئه‌وه‌یه‌: عێراق دوو یا سێهه‌مین سه‌رچاوه‌ی نه‌وته‌ له‌ جیهان دا و هه‌روه‌ها له‌ ناوه‌ندی ناوچه‌یه‌كی پر وزه‌ هه‌ڵكه‌وتووه‌. ئه‌گه‌ر وا بڵێیت، ده‌بێژن خه‌ریكی تیۆری پیلانگێریی

 

ئه‌مریكا له‌ عێراق شكستێكی گرانی له‌ ناسیۆنالیزم به‌ركه‌وت: زۆربه‌ی ئه‌و ناسیۆنالیزمه‌ له‌ چوارچێوه‌ی ئاخێزی بێ توندوتیژ دا ده‌ركه‌وت. ویلایه‌ته‌ یه‌كگرتووه‌كان دیتوانی چه‌كداره‌كان بكوژێت، به‌ڵام له‌به‌رامبه‌ر نیو میلیۆن كه‌س كه‌ ده‌رژانه‌ سه‌رشه‌قامه‌كان هیچی بۆ نه‌ده‌كرا. عێراق به‌ره‌به‌ره‌ توانی به‌سه‌ر كۆنترۆڵی هێزه‌ داگیركه‌ره‌كان دا زاڵ بێت. له‌ نوامبری 2007 به‌ جوانی ده‌ركه‌وت ئه‌مریكا به‌ ئامانجه‌كانی ناگات. لێره‌دا بوو، به‌ فه‌رمی مه‌به‌سته‌كانیان راگه‌یاند: له‌ نوامبری 2007 ده‌وڵه‌تی جۆرج بۆش به‌ فه‌رمی رایگه‌یاند چۆن له‌ داهاتووی عێراق ده‌روانن. ئه‌و (بارودۆخه‌ی داهاتوو) پشتی به‌ دوو مه‌رجی سه‌ره‌كی به‌ستبوو: یه‌كه‌م، ئه‌مریكا ئازاد بێت تا له‌ پێگه‌ سه‌ربازیه‌كانه‌وه‌ كرده‌وه‌ی جه‌نگی ئه‌نجان بدات، دووهه‌م “پشتیوانی له‌ هه‌ڵسورانی سه‌رمایه‌گوزای ده‌ره‌كی و به‌تایبه‌ت ئه‌مریكایی له‌ عێراق بكات”. بۆش له‌ ژانویه‌ی 2008 ئه‌و مه‌سه‌له‌یه‌ی له‌ یه‌كێك له‌ وتاره‌ واژۆكراوه‌كانی دا به‌ روونی باس كردبوو. چه‌ند مانگ دواتر كه‌ له‌گه‌ڵ خۆراگری عێراقیه‌كان رووبه‌روو بۆوه‌ چاوپۆشی له‌و (دوو مه‌رجه‌ سه‌ره‌كیه‌) كرد. هێرش بۆسه‌ر عێراق له‌و كارانه‌ بوو كه‌ ئه‌مریكا گه‌ره‌كی بوو به‌ زۆر و گوشاری له‌ مێژینه‌ی خۆی به‌سه‌ری دا زاڵ بێت، به‌ڵام شكستی هێنا. پێم وایه‌ له‌ گشتیه‌تی خۆیان دا سیاسه‌ته‌كانی ئه‌مریكا جێگیر ماونه‌ته‌وه‌، ئه‌و سیاسه‌تانه‌ی هه‌ڵده‌گه‌رێنه‌وه‌ بۆ شه‌ری دووهه‌می جیهانی. به‌ڵام توانایی وه‌دیهێنانی ئه‌و سیاسه‌تانه‌، روو له‌ كزییه‌.

 

پرسیار: هۆكاری وه‌دی نه‌هاتنیان، ده‌گه‌رێته‌وه‌ بۆ دۆخی ئابووری لاوازی ئه‌مریكا؟

وه‌ڵام: تا راده‌یه‌ك ده‌گه‌رێته‌وه‌ بۆ چه‌ند جه‌مسه‌ری بوونه‌وه‌ی جیهان. ئێستا له‌ جیهان دا چه‌ند ناوه‌ندی زلهێز به‌دی ده‌كه‌یت. له‌ كۆتایی شه‌ری دووهه‌می جیهانی، ئه‌مریكا له‌وپه‌ری هێزی خۆیدا بوو. نیوه‌ی سامانی جیهانی به‌ده‌سته‌وه‌ بوو، زۆربه‌ی ره‌قیبه‌كانی یا له‌تمه‌ی گه‌وره‌یان به‌ركه‌وتبوو یا له‌ناو چووبوون. به‌رنامه‌ی بۆ ئیداره‌ كردنی جیهان داده‌رشت (له‌وكات دا خه‌یاڵی نه‌بوو).

 

پرسیار: مه‌به‌ستت هه‌ر ئه‌و به‌رنامه‌یه‌یه‌ كه‌ به‌ “ناوچه‌ی مه‌زن” ده‌ناسرێته‌وه‌؟

وه‌ڵام: به‌ڵێ. له‌پاش شه‌ری دووهه‌می جیهانی، جۆرج كێنان (سه‌رۆكی ئه‌نجومه‌نی به‌رنامه‌رێژی سیاسه‌ته‌كانی ئه‌مریكا) و كه‌سانی تر ورده‌كاریه‌كانی ئه‌و گه‌ڵاڵه‌یه‌یان هێنایه‌ به‌ر باس و دواتر به‌كرده‌وه‌یان ده‌رهێنا. ئه‌وانه‌ی وا ئێستا له‌ رۆژهه‌ڵاتی ناوه‌راست، باكووری ئه‌فریقیا و ئه‌مریكای لاتین روو ده‌ده‌ن، ده‌گه‌رێنه‌وه‌ سه‌ر كۆتاییه‌كانی ده‌یه‌ی 1940.

 

یه‌كه‌مین به‌ره‌نگار بوونه‌وه‌ی سه‌ركه‌وتوانه‌ دژ به‌ هه‌ژمۆنی ئه‌مریكا 1949 به‌رێوه‌ چوو. واته‌ هه‌ر ئه‌و رووداوه‌ی به‌ “له‌ كیس دانی چین” ناوی ده‌به‌ن. سه‌رده‌مێكی سه‌یره‌ كه‌ هیچكات نه‌خرایه‌ ژێر پرسیار. هه‌میشه‌ پرسیار ئه‌مه‌ بووه‌ كێ له‌ به‌رامبه‌ر له‌ ده‌سچوونی “چین” به‌رپرسیاره‌. له‌ ناوخۆی ئه‌مریكا، مه‌سه‌له‌یه‌كی گه‌وره‌ بوو، به‌ڵام قۆناخێكی گه‌لێك گرنگیشه‌. شتێك له‌ده‌ست ئه‌ده‌یت كه‌ خاوه‌نی بیت: “ئێمه‌ خاوه‌نی چین_ین له‌ ئه‌گه‌ری سه‌ربه‌خۆبوونی له‌ ده‌ستمان ده‌چێت”. دواتریش سه‌رێشه‌ی تری وه‌ك “له‌ده‌ستدانی لاتینی ئه‌مریكا” و “له‌ده‌ستدانی رۆژهه‌ڵاتی ناوه‌راست” و وڵاتانی تریش بوو به‌ باوو…

 

گشت ئه‌مانه‌ پشت به‌ گریمانه‌یه‌ك ده‌به‌ستێت: ئێمه‌ خاوه‌نی جیهانین، هه‌ر شتێك ببێته‌ هۆی لاوازی كۆنترۆڵ و سه‌یته‌ره‌ی ئێمه‌ به‌سه‌ری دا بۆشایی تێده‌كه‌وێ، پێویسته‌ بیر له‌ بوونیاتنانه‌وه‌ بكه‌ین.

ئه‌مرۆكه‌ ئه‌گه‌ر بڵاوكراوه‌كانی تایبه‌ت به‌ سیاسه‌تی ده‌ره‌كی بخوێنیته‌وه‌ یا (گاڵته‌ئامێزتر له‌وه‌ش) گوێ له‌ قسه‌ی كۆماریخوازه‌كان بگریت، به‌رده‌وام ده‌پرسن “چۆن به‌ر به‌ هه‌ره‌سه‌كانی دواتر بگرین؟”.

 

له‌لایه‌كی تریش تواناییه‌كانی ئه‌مریكا بۆ پاراستنی كۆنترۆڵی خۆی به‌خێرایی روو له‌ كزیه‌. له‌ 1970 جیهان هه‌ر به‌و چه‌شنه‌ بوو كه‌ له‌ روانگه‌ی ئابووریه‌وه‌ به‌ سێ جه‌مسه‌ری ناو ده‌برا: جه‌مسه‌ری پیشه‌سازی ئه‌مریكای باكوور به‌ ناوه‌ندیه‌تی ویلایه‌ته‌ یه‌كگرتووه‌كانی ئه‌مریكا، جه‌مسه‌ری ئه‌ورووپایی به‌ ناوه‌ندیه‌تی ئاڵمانیا (كه‌ سه‌نگێكی وه‌های به‌نیسبه‌ت ئه‌وه‌ی پێشۆوه‌ نیه‌) و جه‌مسه‌ری ئاسیای دوور به‌ ناوه‌ندیه‌تی ژاپۆن (ناوچه‌یه‌ك بوو خاوه‌ن گه‌شاوه‌ترین په‌ره‌سه‌ندن له‌ جیهان دا). له‌و كاته‌ به‌دواوه‌ سیسته‌می ئابووری جیهان زیاتر و زیاتر چه‌ند جه‌مسه‌ری بووه‌ته‌وه‌. هه‌ر بۆیه‌ دژوارتر ده‌توانین سیاسه‌ته‌كانمان پراكتیزه‌ بكه‌ین، به‌ڵام بنه‌ما بنه‌ره‌تیه‌كان گۆرانێكی وه‌هایان به‌سه‌ردا نه‌هاتووه‌.

 

“دۆكتۆرینی كلینتۆن” له‌به‌رچاو بگرن: بریتی بوو له‌وه‌ی ئه‌مریكا هه‌ڵبژارده‌یه‌ بۆ ئه‌وه‌ی به‌ پشتبه‌ستن به‌ هێزێكی یه‌كلایه‌نه‌ زه‌مانه‌تی ” ده‌سراگه‌یشتنی نابه‌رته‌سك به‌سه‌ر بازاره‌ سه‌ره‌كیه‌كان، پاشكه‌وته‌كانی وزه‌ و سه‌رچاوه‌ ستراتژیه‌كان” بكات. ئه‌وه‌ واوه‌تر له‌وه‌شه‌ كه‌ جۆرج بۆش وتبووی. ئه‌و “دۆكتۆرینه‌ی كلینتۆن” بێده‌نگ و هه‌را بوو، خۆبه‌زلزان و تووش نه‌بوو، بۆیه‌ شۆرشی لێ نه‌كه‌وته‌وه‌. به‌ كورتیه‌كه‌ی ئه‌و وه‌كاله‌ت و مافه‌ ئێستاش هه‌ر ماوه‌ته‌وه‌ و له‌ كولتووری روناكبیریشدا به‌رچاو ده‌كه‌وێت.

 

له‌پاش كوشتنی “ئۆسامه‌ بن لادێن” كه‌ ئه‌و گشته‌ هه‌راوهوریایه‌یان بۆ وه‌رێخست، چه‌ند روانگه‌یه‌كی ره‌خنه‌گرانه‌ خرایه‌ روو كه‌ مه‌شروعیه‌تی ئه‌و كاره‌ی ده‌برده‌ ژێر پرسیار. چه‌ندین سه‌ده‌ له‌مه‌وبه‌ر شتێك به‌ناوی “گیرمانه‌ی به‌رائه‌ت” بوونی هه‌بوو. ئه‌گه‌ر گومانت له‌ كه‌سێك هه‌بوایه‌، تا ئه‌وكاته‌ی تاوانه‌كه‌ی نه‌سه‌لمێندرابوایه‌، ته‌نیا گومانلێكراو بوو. ده‌كرا بهێنرێته‌ ئه‌مریكا. ئه‌وه‌ ناوه‌رۆكی سه‌ره‌كی یاسای بنه‌ره‌تی ئه‌مریكایه‌… ئه‌و ره‌خنانه‌ به‌ره‌ورووی هێرشی گه‌لێك لایه‌ن ته‌نانه‌ت چه‌په‌ لیراڵه‌كانیش بووه‌… من له‌و كه‌سانه‌ بوو هێرشی توندم كرایه‌سه‌ر…

پێشتر ئاماژه‌م به‌و مه‌سه‌له‌یه‌ له‌ كولتووری روناكبیری و ئه‌وه‌ی به‌ لیبراڵی چه‌پ ناو ده‌برێت كرد. بنه‌ماكانی ناوه‌ند زۆر گۆرانی به‌سه‌ردا نه‌هاتووه‌، به‌ڵام ره‌نگه‌ توانایی بۆ به‌كرده‌وه‌ ده‌رهاتنی ئه‌م بنه‌مایانه‌ له‌ كزی بێت، هه‌ر بۆیه‌ زۆر له‌سه‌ر لاواز بوونی ئه‌مریكا ده‌دوێم.

 

له‌ دواهه‌مین ژماره‌ی “ Foreing Affairs” (كه‌ بڵاوكراوه‌ی سه‌ره‌كی رێكخراوه‌كه‌یه‌) له‌ كۆتایی ساڵی 2012 بروانن: له‌سه‌ر به‌رگه‌كه‌ی به‌ سه‌ردێرێكی گه‌وره‌ نووسیوێتی “ئایا ئه‌مریكا به‌ كۆتایی گه‌یشتووه‌؟”. ئه‌و رسته‌یه‌ هه‌مان سكاڵی ئاسایی ئه‌و كه‌سانه‌یه‌ كه‌ لایان وایه‌ گشت شتێ هی ئه‌وانه‌. گه‌ر پێت وابێ هه‌موو شتێك هی تۆیه‌ و خه‌ریكه‌ له‌ كیست ده‌چێت، كه‌واته‌ تراژدیای لێ ده‌كه‌وێته‌وه‌ و جیهان به‌ره‌و نابوودیه‌. گه‌لێك له‌مه‌وبه‌ر ئێمه‌ چین_مان له‌ ده‌ست داوه‌، رۆژهه‌ڵاتی باشووری ئاسیامان له‌ده‌ست داوه‌، باشووری ئه‌مریكامان له‌ده‌ست داوه‌. ئایا ئه‌مریكا به‌ كۆتایی گه‌یشتووه‌؟ ئه‌م “پرسیاره‌” جۆرێك پارانۆیا و (وه‌همه‌). به‌ڵام ئایا ئه‌وه‌ ته‌نیا پارانۆیای گروپه‌ یه‌كجار ده‌وڵمه‌ند و به‌هێزه‌كان نیه‌. ده‌نا ئه‌گر تۆ هیچت بۆ له‌ده‌ستدان نه‌بێت و له‌ نه‌داران بیت، نه‌هامه‌تی چی.

پرسیار: نیۆیۆرك تایمز ده‌نوسێت “سه‌رلێشێواوی سیاسی له‌ هه‌مبه‌ر به‌هاری عه‌ره‌بی ده‌رخه‌ری ئه‌وه‌یه‌ ئامانجه‌كانی ئه‌مریكا چه‌نده‌ دژ به‌یه‌كن، وه‌ك پشتیوانی له‌ دیموكراسی، مه‌یل به‌ سوبات، نیگه‌رانی به‌رامبه‌ر به‌ ئیسلامگه‌راكان كه‌ بوونه‌ته‌ به‌دیلی به‌هێزی سیاسی”. تایمز هه‌ر ئه‌و سێ بابه‌ته‌ بۆ ئه‌مریكا وێنا ده‌كات. ئێوه‌ چۆن له‌ مه‌سه‌له‌كه‌ ده‌روانن؟

 

وه‌ڵام: دوو له‌وان راسته‌. به‌ڵام ده‌بێ له‌ یادمان نه‌چێت مه‌به‌ست له‌ سوبات چیه‌. سوبات مه‌به‌ست له‌ هاوهه‌نگاویه‌ له‌گه‌ڵ ئه‌مریكا. بۆ وێنه‌، یه‌كێك له‌و تۆمه‌تانه‌ی وه‌ك (هه‌ره‌شه‌یه‌كی گه‌وره‌ی ده‌ره‌كی) ده‌یخه‌نه‌ پاڵ ئێران، بریتیه‌ له‌وه‌ی خه‌ریكی نائارام كردنی عێراق و ئه‌فغانستانه‌. چۆن؟ به‌ په‌ره‌پێدانی نفوزی خۆی له‌ وڵاتانی هاوسنوور. له‌لایه‌كی تریش، كاتێك خۆمان هێرش ده‌كه‌ینه‌ سه‌ر ئه‌و وڵاتانه‌ و خاپووریان ده‌كه‌ین، ئه‌وا خه‌ریكی جێ خستنی “سوبات و ئاسیش”ین.

 

گه‌لێك جاران ئه‌و رسته‌یه‌ی “جیمز چیس” (سه‌رپه‌ره‌شتیاری پێشووی Foreing Affairs ) وه‌ك نمونه‌ هێناوه‌ته‌وه‌. ئه‌و له‌ كاتی رووخانی “سالوادۆر ئالێنده‌” له‌ شیلیا و داسه‌پاندنی دیكتاتۆری ئاگۆستۆ پینۆشه‌ له‌ 1973 نووسی: “ده‌بێ شیلیا بێ سوبات بكه‌ین، تا سوبات جێگیر بێ”. ئه‌وه‌ ناكۆكی نیه‌؟ واته‌ خه‌ڵكی شیلی هه‌ر ئه‌و كاره‌ بكه‌ن كه‌ پێیان ده‌ڵێین. به‌ڵێ به‌م لایه‌نه‌وه‌، پشتیوانی سوبات و ئاسایشین.

 

نیگه‌رانی له‌بابه‌ت ئیسلامی سیاسیش، وه‌ك نیگه‌رانی له‌ هه‌ر ره‌وتێكی سه‌ربه‌خۆی تره‌. هه‌رچی سه‌ربه‌خۆیه‌ ده‌بێ نیگه‌رانی بیت، چوونكه‌ له‌وانه‌یه‌ لاوازت بكات. له‌ راستی دا فشقیاته‌، چونكه‌ ئه‌مریكا و بریتانیا له‌ دێره‌وه‌ پشتیوانیان له‌ ئیسلامی توندرۆ (نه‌ك سیاسی) كردووه‌ و وه‌ك هێزێك دژ به‌ ته‌شه‌نه‌ سه‌ندنی ناسیۆنالیزمی سێكۆلار (كه‌ نیگه‌رانیی سه‌ره‌كیانه‌) به‌ كاریان هێناوه‌. بۆ وێنه‌ عه‌ره‌بستانی سعودی بونیادگه‌راترین و توندرۆترین حكومه‌تی ئیسلامی جیهانه‌. پروپاگه‌نده‌ش ده‌كات، له‌ پاكستان په‌ره‌ به‌ ئیسلامی توندرۆ ده‌دات و خه‌ریكی خوڵقاندنی ترس و خۆفه‌. به‌ڵام عه‌ره‌بستان بووه‌ته‌ سه‌نگه‌ری سیاسه‌ته‌كانی ئه‌مریكا و بریتانیا. ئه‌و دوو وڵاته‌ به‌رده‌وام له‌ به‌رامبه‌ر هه‌ره‌شه‌ی ته‌شه‌نه‌ سه‌ندنی ناسیۆنالیزمی سێكۆلار له‌ چه‌شنی جه‌ماڵ عه‌بدولناسر له‌ میسر و عه‌بدولكه‌ریم قاسم له‌ عێراق، پشتیوانیان له‌ حكومه‌تی عه‌ره‌بستان كردووه‌. به‌ڵام هیچ كامیشیان ئیسلامی سیاسیان خۆش ناوێ، چونكه‌ ئه‌گه‌ری سه‌ربه‌خۆ بوونی هه‌یه‌.

 

مه‌یلی ئێمه‌ به‌ دیموكراسی هه‌ر له‌ ره‌نگی ژۆزێف ستالین و به‌رپرسیارێتی سۆڤیه‌ته‌ به‌ ئازادی، دیموكراسی و یه‌كسانی له‌ جیهان دا. ئه‌و (مه‌یل به‌ دیموكراسی)ه‌ی رۆژئاواییه‌كان له‌چه‌شنی هاوتاكانیان له‌ ئێرانه‌ كه‌ ره‌نگه‌ ئه‌گه‌ر له‌ زمان مه‌لایه‌كه‌وه‌ ده‌یبیستی گاڵته‌ت پێی دێت…

 

پرسیار: پاش چه‌ند مانگ له‌ رووخانی مۆباره‌ك له‌ میسر، له‌گه‌ڵ تۆمه‌تی جینایی به‌ره‌وروو كرایه‌وه‌ و خه‌ریكن دادگایی ده‌كه‌ن. باوه‌ر ناكرێ رێبه‌رانی ئه‌مریكایی به‌هۆی جینایه‌ته‌كانیان له‌ عێراق و ئه‌فغانستان، رۆژێك به‌رو رووی به‌رپرسیارێتی خۆیان بكرێنه‌وه‌. له‌ ماوه‌یه‌كی نزیك دا ئاڵوگۆر له‌م باره‌یه‌وه‌ دێته‌ دی؟

وه‌ڵام: له‌ بنه‌ره‌ت دا ئه‌وه‌ هه‌ر هه‌مان بنه‌مای یگلاسیاسه‌: بنه‌مای نه‌زمی نێونه‌ته‌وه‌یی وه‌هایه‌ ته‌نیا ویلایه‌ته‌ یه‌كگرتووه‌كانی ئه‌مریكا بۆ هه‌یه‌ توندوتیژی به‌كار بێنێ. چۆن ده‌توانی كه‌سانی تر تاوانبار به‌كه‌یت؟!

 

_*ئه‌م وتووێژه‌ی برێسمین له‌گه‌ڵ چۆمسكی له‌ رۆژنامه‌ی “گاردیه‌ن” بڵاو كراوه‌ته‌وه‌. ده‌یڤید برێسمین، هه‌واڵنێری ئه‌مریكایی، دامه‌زرێنه‌ری رادیۆیه‌كی ره‌خنه‌گره‌ به‌ ناوی “ئه‌ڵترناتیڤ” له‌ ئه‌مریكا. ئه‌م وتووێژه‌ كورت كراوه‌ته‌وه‌.

 


Bookmark and Share